Олександр Духнович – Піснь простонародна: Вірш

«Прийди ти до нас
Хоть на малий час.
Хочеш вечір, хочеш рано,
Хоч убрано, хоч подрано
Прийди ти до нас!»
«Не пойду до вас
Ні на малий час,
Ані вечір, ані рано,
Ні убрано, ні подрано
Не пойду до вас».
«Прийди ти до нас
Хоть на малий час,
Дамо ти масной сметанки,
Наваримо ти стеранки,
Прийди же до нас!»
«Не пойду до вас
Ні на малий час,
Не хочу вашу сметанку,
Не хочу вашу стеранку,
Бо те все ваш квас».
«Прийди ти до нас
Хоть на малий час,
Дамо ти сира, жентиці,
Ізбієм ти яєчниці,
Прийди же до нас!»
«Не пойду до вас
Ні на малий час,
Не хочу вашу жентицю,
Ні сира, ні яєчницю,
Не пойду до вас!»
«Прийди ти до нас
Хоть на малий час,
Наваримо ти пироги
З сиром, маслом — о три роги,
Прийди же до нас!»
«Не пойду до вас
Ні на малий час,
Не хочу ваши пироги,
Хоть би били о сто роги,
Не пойду ні раз».
«Прийди ти до нас
Хоть на малий час,
Раді будуть тобі наші,
Наварять ти з медом каші,
Ой прийди сейчас!»
«Не пойду до вас
Ні на малий час,
Не хочу гостини ваші,
Ані меду, ані каші,
Не пойду до вас!»
«Прийди ти до нас
Хоть на малий час,
Дамо ти доброй горілки,
Вина, пива і медівки,
Погостимся враз!»
«Не пойду до вас
Ні на малий час,
Не хочу вашу горілку,
Вино, пиво, ні медівку,
Не хочу ні раз!»
«Прийди ти до нас
Хоть на малий час,
Дамо ти грушки, оріхи,
Сливок, яблок і два міхи
Понесеш од нас!»
«Не пойду до вас
Ні на малий час,
Бо у мене зуби лихі,
Я не кусаю оріхи,
Не пойду до вас».
«Прийди же до нас!
Ой пожалуй нас,
Напечемо ти баники,
Капустинки, сировинки,
Погостишся в нас!»
«Не пойду до вас
Ні на малий час,
Не хочу я капустинки,
Сировинки, маковинки,
Не хочу од вас!»
«Прийди же до нас,
Ой послухай нас,
Дамо ти красну Оленку,
Чорнобриву і біленьку,
Прийди же сейчас!»
«Так лечу до вас
І на вічний час,
Про мою милу Оленку,
Чорнобриву і біленьку,
Пойду і сто раз!»